Tsertsa

Dichonéo

Contenù di site

Multimédià

Teste eun patoué

Documàn

59imo Concour Cerlogne : eun bilàn pozetif

20 juillet 2021

concours-cerlogne-ravaneun_5088_l.jpg

(patoué di-z-Amaveulle)

Euncó sit an, magrì le-z-eumpatsemèn que la pandémì l’at eumpouzó, l’Assessorà di bièn queulterel, di tourisme, di-z-espor é di commerse l’a propouzó la 59ima édechón di Concour Cerlogne dedià i patoué.

Le-z-écoulle l’an repondù pi que amoddo é so baille coadzo : i concour l’ an partesipó 16 écoulle di petchoù, 19 écoulle primére é eunna secondére di premì degré, pe eun total de apepré 1000 écouillì.

Le cllasse l’an travaillà su lo tème prézentó « Le sondzo, le-z-étre eunviziblo é le conte fantasteuque », eun compagnì, lo lon de l’an, di-z-animachón queulterelle é lengueusteuque féte pe eun groupe de chouì animateur.

Le-z-attivitó eun cllasse son itéye accompagnéye pe de vidéó réalizéye pe le-z-esper que contaon la conta de « Ravaneun », élaborachón d’an fabla di frie Grimm « Raiponce » adatéye a eunna verchón de inque, salla de « La prisonnière de la tour » de Jean-Jacques Christillin.

Vu que la tradechonella fita finala l’a po poussù itre organizéye, pe recompensé le-z-écouillì é leur eunségnàn pe l’eungadzemèn, la compagnì téatrala Palinodie, que dèi catche-z-àn travaille a eun projé pe conté la Val d’Outa eun micllèn le déféente queulteue, l’et itéye euntsardjéye de écrie la pise de Ravaneun, prézentéye eun plen er i mèi de mi é de jeun deun le quemeun-e di-z-écoulle que l’ayàn travaillà i projé.

Tcheu le-z-écouillì é le-z-eunségnàn l’an étò resù lo livro « Lé grose fuméle » (le fenne jéante), an léjanda de la tradechón que y è deun lo livro « Merveilles dans la Vallée » de Alexis Bétemps é Lidia Philippot é pi co an cornise ieui pourèn beutté l’imadze di souvenir que lamon de pi.

Vo pouéde avétché le vidéó di parcour didateucco deun la séchón Concour Cerlogne di sito patoisvda.it

Si site permè de vo mandér d'atre «cookies» (témouèn de connéchón). Se vo asétade l'utilizachón di «cookies» cliccade su OK, se vo vouléde pi d'eunformachón ou vo vouléde refezé, alléde a la padze di-z-eunformachón.

Padze d'eunformachón